ILOILO CITY- Nanindugan si Iloilo Governor Arthur Defensor Jr., nga indi kinahanglan sang probinsya nga ibalik ang mas strikto nga restrictions kaangay sang MECQ ukon ECQ kasunod sang pagtaas sang kaso sang COVID-19 local transmission.
Sa interview sang Bombo Radyo kay Defensor, iya ginpahayag nga indi sustainable kag mahimo nga mamierdehan ang ekonomiya kun ipatuman ang mas stritko nga quarantine measures.
Suno kay Defensor, bastante na ang probinsya sa Modified General Community Quarantine (MGCQ) apang magahimo lang ini sang adjustments may kaangtanan sa pagpatigayon sang public gatherings kaangay sang haya kag prusisyon agud masiguro ang social distancing.
Samtang, may kaangtanan naman sa mga pagpapauli sang mga Locally Stranded Individuals, ginpahayag ni Defensor nga may yara sang manugpauli nga 50 ka tawo gikan sa Cagayan de Oro,46 gikan sa Cebu sa diin 50 ang quota,kag ang gikan sa Manila nga 250 ang quota .
Suno kay Defensor, may ginauyatan na ini nga manifesto kag nagpakig-angot naman ini sa Philippine Coast Guard apang wala pa sang petsa ang ila pagpauli.
