ILOILO CITY – Balik-byahe na ang provincial buses sa Iloilo kadungan sang pagpaidalom sa probinsya sa Modified General Community Quarantine sugod bwas, Hunyo 1.
Sa interview sang Bombo Janice Original, Administrative Manager sang Vallacar Transit Inc., iya ginpahayag nga may yara na sang byahe sa Iloilo-Capiz, Iloilo-Antique kag Iloilo-Kalibo vice versa apang yara lang sa 50% ang nahatagan sang special permit.
Suno kay Original, pagasundon ang bag-o nga guidelines sang Land Transportation Franchising and Regulatory Board may kaangtanan sa pamasahe kun sa diin magapabilin sa P11 ang minimum sa non-airconditioned bus kag P13 naman ang minimum sa airconditioned bus samtang P2 naman ang dugang sa kada kilometro.
Hugot man nga ipatuman ang social distancing sa sulod sang bus kun sa diin 50% lang ang sitting capacity kag mandatory ang pagsuksok sang facemask kag pagpahamtang sang sanitizers.
Nagpanugyan naman ang natungdan nga sa Hunyo 1, tanan nga first trip sang provincial buses ang magahalin sa terminal sa Iloilo bangud tanan nga unit yara pa sa main office matapos ang maintenance check-up.
