ILOILO – Indi na dapat paghulaton sang mga kabanwahan sa probinsya sang Iloilo ang memorandum circular nga iga-issue sang Department of Interior and Local Government (DILG) kaangot sa 75-day road clearing operation.
Ini ang pahayag ni Provincial DILG Officer Teodora Sumagaysay.
Sa interview sang Bombo Radyo kay Sumagaysay, iya ginpahayag nga dapat padayunon sang tagsa ka Local Government Unit (LGU) ang naumpisahan na nga pagpanghawan sa mga obstruction sa dalan.
Suno kay Sumagaysay, dapat nga diskusyunan sang mga opisyal kon ano na ang nahimo sa banwa, kon ano pa lang ang ginahimo, kag kon ano pa ang dapat nga himuon.
Iya ginpahayag nga kinahanglan man magtuon sang probinsya sa mga sala ukon kakulangan sang ginpatigayon nga Oplan Hawan nga una nga ginmandu ni Presidente Rodrigo Duterte, sa diin may mga banwa sa Iloilo nga nakabaton sang rating nga ‘low compliance’ sa assessment sang DILG.
Ginkumpirma man ni Sumagaysay nga wala pa sang nabaton nga memorandum ang probinsya.
Nahibaluan nga ang 75-day count sa clearing operation ang ginpahayag sang DILG agud dalayon nga mahawanan ang mga obstruction sa mga public roads bangud may mga LGUs nga wala sang compliance sa mandu sang ahensiya.
Una nga gin-report sang ahensya nga sa 1,600 ka LGUs sa pungsod, 97 ang napaslawan nga mag-comply sa una nga 60-day road clearing operations.
