Provincial Disaster Risk Reduction and Management Council, nagpasar sang anum ka mga resolution sa katuyu-an nga indi na masulit pa ang natabo nga region-wide unscheduled power interruption

ILOILO – Anum ka mga resolution ang napasar ni Iloilo Governor Arthur Defensor kag ini ang unanimously approved sang mga myembro sang Provincial Disaster Risk Reduction and Management Council sa ginapatigayon nga pagsinapol sa natabo nga lapnagon nga power interruption sa isla sang Panay, Guimaras kag Negros.

Ang mga resolution ang ginlakipan sang mga masunod:

*Naga-request sa National Grid Corporation of the Philippines nga padasigon ang pag-upgrade kag pag-improve sang Barotac Viejo Substation
*Naga-request sa National Grid Corporation of the Philippines nga regular nga i-update ang probinsya sang Iloilo sa status sang grid
*Nagapanawagan sa National Grid Corporation of the Philippines nga i-synchronize ang “protection relays of transmission, generation and distribution”.
*Nagapanawagan sa National Grid Corporation of the Philippines nga i-review ang reliability sang tagsa ka Visayas sub-grid
*Padasigon ang Ancillary Service Procurement Agreement sa Energy Regulatory Commission kag:
*Pagpatuman sang conservation measure sa household level

Sa interview sang Bombo Radyo kay Governor Defensor, iya ginpahayag nga kun mahatagan sang National Grid Corporation of the Philippines ang expansion sang Barotac Viejo substation, mabuhinan ang risgo nga maka-eksperyensya liwat sang power interruption ang isla sang Panay.

Una na nga nagmandu si President Ferdinand Marcos Jr., sa National Grid Corporation of the Philippines nga gilayon nga kaayuhon ang third stage sang Cebu-Negros-Panay backbone project kag ini ang ginalakipan sang construction sang 238km long circuit, 230 kilo volt capacity transmission line nga nagaangot sa tatlo ka mga isla sang Cebu, Negros kag Panay,nga ginalakipan sang expansion sang Barotac Viejo substation, E.B Magalona cable terminal station kag Bacolod substation.

Suno kay Defensor, base sa iya pagpakigkonsulta sa mga power distribution utilities sa probinsya sang Iloilo, dako ang posibilidad nga makaayo , mangin estable ang supply sang kuryente kag makabulig pa sa restoration kun upgraded kag ma-improve ang Barotac Viejo substation.

Kun matigayon ang expansion sang Barotac Viejo substation dugang sang gobernador, makasulod man sa Panay ang supply sang kuryente halin sa Leyte, Samar, Bohol, Negros kag Cebu nga amo ang nagabug-os sang Visayas grid.

Dugang pa sang natungdan, nagsiling ang Department of Energy nga ang substation ang kabahin sang protection system rason nga dapat mabakod ini.