Ginpadala na sang Iloilo Provincial Government ang mga dokumento sa supreme court (SC) nga nagapamatok sa nangin ruling sang korte nga nagapahanugot sa commercial fishing vessels nga makasulod sa municipal waters sang Iloilo.
Sa interview sang Bombo Radyo kay Atty. Dennis Ventilacion, head sang Iloilo Provincial Legal Department, iya ginpahayag nga natalana nga mag-file sang motion for leave of court ang Iloilo Provincial Government sa idalom sang direktiba ni Governor Arthur Defensor Jr.
Ini agud mag-intervene kag batunon ang dugang nga mga dokumento nga gin-file sang mga petitioners may kaangtanan sa nangin desisyon sang Supreme Court nga nagapahanugot sa commercial fishing vessels nga makasulod sa 15-kilometer municipal waters.
Lakip si Atty. Ventilacion kag Provincial Agriculture Office’s Fisheries Division Head Felina Grace Basco sa nagpatigayon sang final review sang mga dokumento antes ipasa sa Supreme Court.
Nahibaluan nga sang damlag lang, nagpasar sang resolution ang Sangguniang Panlalawigan sang Resolution 2025-062 nga naga-authorize kay Gov. Defensor nga i-represent ang probinsya sang Iloilo sa Korte Suprema may kaangtanan sa mga petitions nga gin-file batuk sa ruling sang SC.
Suno kay Ventilacion, 16 ka mga banwa ang nagpetisyon, kon sa diin, halos naghalin sa coastal municipalities sang probinsya.
Nakasaysay naman sa petition letter ang mga concerns sang mga manugpangisda lakip ang negatibo nga matuga sang pagsulod sang commercial fishing vessels.
