ILOILO – Magapakig-angot sa gihapon ang Iloilo Provincial Government sa national government agud makapangayo sang update sa naglugdang nga Gulf Livestock 1 bangud sa Bagyo Maysak sa Japan.
Sa interview sang Bombo Radyo kay Governor Arthur Defensor Jr., iya ginpahayag nga nakigsapol sa iya ang pamilya sang mga Ilonggo crew nga lakip sa nagapabilin nga missing bangud sang trahedya.
Suno kay Defensor, indi man tuman kadaku ang tingog sang probinsya kun sila ang magapadala sang sulat sa Japan agud nga maghingyo nga padayunon ang search and rescue operations.
Bangud sini, sa national government ipaagi ang mga hingyo agud mapalab-ot sa concerned agencies sa Japan.
Nahibaluan nga una na nga gin-anunsyar sang Japanese Coast Guard nga ginsuspinde na ang sea and aerial search para sa mga missing apang magapabilin ang regular sea patrol.
Sa 39 ka Filipino crew nga yara sa nasambit nga barko, ginpahayag sang Overseas Workers Welfare Administration (OWWA) Region VI nga siyam ang nalakip nga Ilonggo seafarers — 2 sa Pototan, 2 sa Oton, kag tag isa halin sa Guimbal, Pavia, Sta. Barbara, Tubungan, kag Zarraga. #
(Photos: BALITA HALIN SA KAPITOLYO and AFP)
