Nagpalab-ot sang pila ka mga concern ang Ungka Transportation Operators Drivers Association (UTODA) sa opisina ni Iloilo City Mayor Jerry Treñas.
Sa interview sang Bombo Radyo kay Francis Pueda, presidente sang UTODA, iya ginpahayag nga humalin sang nag-umpisa ang road closure sa ginakaayo nga flyover sa Barangay Ungka 2, Pavia, Iloilo kag Barangay Ungka, Jaro, Iloilo City, wala na naga-unload ang Provincial Jeepneys kag mga modernized nga mini bus sa ITGSI Ungka Terminal.
Suno kay Pueda, maathag ini nga pagbalewala sa Perimeter Boundary Ordinance agreement.
Pahayag ni Pueda, ila man nga nanutaran nga ang halos tanan nga pasahero nga ginadrop sang Provincial Jeepneys sa duha ka mall sa Pavia, Iloilo ang lunsay nagasakay sa mga modenized mini-bus nga gindesignar man kuntani nga maghulat sang pasahero sa perimeter boundary terminal sa ITGSI Ungka, Jaro, Iloilo City.
Bangud sini suno sa iya, tuman ka apektado ang kinitaan sang traditional Public Utility Jeepneys (PUJs) nga nagahulat sa Provincial Jeepneys nga mag-unload sang mga pasahero sa ITGSI Terminal ukon Perimeter Boundary Terminal.
Hingyo sang natungdan sa alkalde sang syudad, kuntani mapalab-ot man ang ila nga concerns sa Land Tranportation Office kag Land Transportation Franchising and Regulatory Board (LTFRB) agud mahatagan man sang penalidad ang mga driver nga wala nagasunod sang ila franchise route.
Samtang, naga-agunto naman ang isa ka driver sang Public Utility Jeepney nga may walo ka mga kabataan bangud sa tuman ka pigado nga byahe.
Sa interview sang Bombo Radyo kay Joel Millama, driver sang PUJ nga may ruta nga Ungka ITGSI – Parola, Iloilo City and vice versa, iya ginpahayag nga P400 ang ila nga arkila sang ginabyahe nga Jeepney sa diin sa masami, kapin P150 na lamang ang nabilin niya nga income sa isa ka adlaw.
Suno kay Millama, isa man sa rason sang mapin-ot nila nga kinitaan sa pagbyahe amo ang indi pagsunod sang Provincial Jeepney drivers sa Perimeter Boundary Ordinance agreement sa diin wala ang mga ini naga-unload sang pasahero sa insakto nga terminal.
Bangud sini, apisar nagadangat na sa masobra isa ka oras ang ila nga hulat sang mga pasahero sa ITGSI Terminal ukon Perimeter Boundary Terminal, wala sa gihapon nagakapuno ang ila ginabyahe nga Jeep.
Nagapanawagan man ang natungdan sa gobyerno nga kuntani buligan man sila kag hatagan sang igtalupangod.
