GUIMARAS – Patigayunon subong nga adlaw ang legislative inquiry sang Sanguniang Panlalawigan sang Guimaras tuhoy sa natabo nga Iloilo Strait tragedy.
Sa interview sang Bombo Radyo kay Guimaras Vice Governor John Edward Gando, iya ginpahayag nga ang legislative inquiry ang maga-umpisa 9:00 buwas sang aga.
Suno kay Gando, lakip sa mga imbitado amo ang mga gin-relieved nga opisyal sang Philippine Coast Guard Iloilo, Philippine Coast Guard Guimaras kag Maritime Industry Authority, mga pump boat crew kag operator lakip na ang mga survivor kag rescuers.
Ginpahayag ni Gando nga kakatuyu-an sang nasambit nga legislative inquiry amo nga mahibalu-an kun ano gid ang matuod nga natabo sang Agosto 3 sa diin 31 ang patay.
Paagi sa nasambit nga legislative inquiry, hibaluon kun ano ang protocol sa pagpatigayon sang rescue operation sang Philippine Coast Guard kag iban pa nga rescue volunteers.
Ang mangin resulta sang legislative inquiry ang isa man ka pagpanghanda sa tion nga magpatigayon sang inquiry ang national government.
Samtang, ginkalipay naman ni Gando nga nagbalik na ang biyahe sang pumpboat.
Suno kay Gando, mabuhinan na ang pag-agunto sang mga pasahero nga nagatabok sa syudad sang Iloilo kag amo man sa probinsya sang Guimaras.
Magluwas sa mga pasahero, nabuhinan man ang pagbakho sang mga pump boat crew kag operator bangud nga nagbalik ang biyahe matapos ang masobra sa isa ka semana.
Kun naglawig pa suno sa natungdan ang untat-biyahe, mahimo nga ipaidalom sa State of Calamity ang probinsya sang Guimaras.
