Ginpatigayon sang Iloilo City Government ang inspeksyon sa Distrito sang Lapuz agud mausisa ang kahimtangan sang Mansaya kag Budburan Creek, nga ginakabig nga critical area kun tag-ululan nga nagatuga sang pagbaha.
Sa interview sang Bombo Radyo kay Iloilo City Councilor Johnny Young, ginpahayag niya nga sa ila paglibot, nakita nila ang madamo nga kapaltahan sa proyekto sang Department of Public Works and Highways (DPWH) kag Iloilo City Government (ICDEO).
Suno sa iya, wala sang koordinasyon sa LGU kag sa barangay kapitan sang Lapuz, kag madamo sang informal settlers ang nagapuyo sa palibot sang creek.
Ginpamangkot man nila kun may ECC (Environmental Compliance Certificate) ang proyekto.
“Kadamo gid ya kapaltahan nga naubra sang DPWH, una wala sila ga-coordinate sa Local Government Unit (LGU), wala sila ga- coordinate sa barangay captains naton sa diri sa may Lapuz, kadamo pa gali sang informal settlers, ang aton ginapamangkot kun may ECC (Environmental Compliance Certificate) na sila,” suno kay Young.
Nakibot sila nga ang lugar nga dapat waterway, ginbutangan sang roadway nga nagapugong sa natural nga ilig sang tubig.
Malibot pa sila sa iban nga distrito pareho sang Molo kag Jaro agud mahibaluan pa gid ang iban nga proyekto nga ginapatigayon nga wala sang husto nga koordinasyon.
Gintumod man sang konsehal nga ang City Government amo ang nagapadugay sang proyekto bangud sa kakulangan sang koordinasyon, nga nagapekto sa plano nga pagbangon sang Budburan Creek.
