ILOILO CITY- Ginapreparahan na sang Philippine Statistics Authority (PSA) sa Iloilo ang patigayunon nga 2024 Census of Population (POPCEN) kag Community-Based Monitoring System (CBMS).
Natalana ini sa Hulyo 15 tubtob sa Septyembre 16.
Suno kay Ma. Goretti M. Novilla, Iloilo Provincial Statistical Office OIC Supervising Statistical Specialist, sakop sang census kag monitoring ang syudad kag probinsya.
Ang local government sang Iloilo City naman ang magahatag sang pondo para sa pagpatigayon sang Community-Based Monitoring System.
Ginpaathag ni Novilla nga katuyuan sang amo nga hilikuton amo nga mangin updated imbentaryo sa populasyon kag mapasanyog ang social registries para sa mas maayo nga plano kag implementasyon sang mga programa sang gobyerno.
