Magapatigayon sang month-long celebration ang Philippine Statistics Authority (PSA) may kaangtanan sa ika-32 nga tuig nga pagsaulog sang national statistics month.
Sa interview sang Bombo Radyo kay Fred Sollesta, Director sang PSA Region VI, iya ginpahayag nga ang pagsaulog sang national statistics month sa tagsa ka bulan sang Oktubre ang gin-umpisahan sang tuig 1990 sang nagpaggwa sang presidential proclamation No. 647 si anay Presidente Corazon Aquino.
Lakip sa katuyuan sang National Statistics Month amo ang pag-promote, pag-enhance kag paghatag sang awareness kag apresasyon sa importansya sang statistics sa nanuhay-tuhay nga sektor sang komunidad kag pagsuporta sa publiko sa pagpasanyog sang kalidad kag standard sang statistics sa pungsod.
Ang tema subong nga tuig sang selebrasyon amo ang ”Revving up for Economic and Social Recovery Through Evidence-Based Policies.”
Suno kay Sollesta, sentro sang tema subong nga tuig ang pagpasangkad sang importansya sang statistics bilang basehan sang policy decions agud ma-address ang socioeconomic impact sang COVID-19.
Pahayag niya nga ang paggamit sang relevant statistics bilang solid nga ebidensya ang makagiya kag makasuporta sa efforts sang nasyon padulong sa socioeconomic recovery.
Kadungan sini, may patigayunon nga mga webinars kag activities ang ahensya subong nga tuig kag wala sang mga pampubliko nga pagtililipon.
Kalakip sa mga aktibidad amo ang virtual lecture series, virtual exhibit, poster making contest, statistical analysis quiz kag iban pa.
Ini ang pagasakupan sang stakeholders, government employees kag mga estudyante.
