ILOILO CITY- Nagpahanumdom ang Philippine Statistics Authority (PSA) sa mga indibidwal nga magpamalibad nga mag- comply sa national population census kag survey nga mahimo sila nga mapreso kag multahan sang P100,000.
Ini base sa nasaad sa Republic Act No. 10625 ukon ang Philippine Statistical Act of 2013.
Nasaad man nga ang respondents ang ginaobligar nga maghatag sang matuod kag kompleto nga sabat sa pamangkot.
Subong nga tuig, maga-deploy ang ahensya sang kapin 70,000 enumerators sa bilog nga pungsod agud magpatigayon sang survey kag consensus.
Ginaupod sang Population Census ang Community-Based Monitory System (CBMS)
Ang makolekta nga data ang gamiton para ma-update ang population inventory sang pungsod kag listahan sang benepisyaryo sang social protection initiatives kaangay sang Pantawid Pamilyang Pilipino Program (4PS).
Ang census kag survey opisyal nga magasugod sa Lunes, Hulyo 15.
