ILOILO CITY – 400 ka unit sang ginkumpiska nga tricycle, motorisklo, trisikad kag E-bike ang amat-amat nga ginpangbalik sang Public Safety and Transportation Management Office.
9:00 kaina sang aga sang gin-umpisahan ang turn-over sa La Paz Public Plaza kun sa diin temporaryo nga gin-impound ang nasambit nga mga salakyan.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga kun liwat nga madakpan ang mga nagabyahe sang colorum nga salakyan, magabayad na sang multa ang driver ukon operator.
Suno kay Conlu, kinahanglan ang impounding receipt antes makuha ang salakyan, wala na ginpabayaran ang multa kag ginhatagan pa sang food assistance ang mga driver.
May kaangtanan sa ginapatuman nga General Community Quarantine, mahimo na nga makabyahe ang mga legal nga tricycle, motorisklo, trisikad kag E-bike umpisa sa Lunes, Mayo 18 santo sa ila nga ruta.
Nahibalu-an nga ang apprehension sang Public Safety and Transportation Management Office ang nag-umpisa sang ginpatuman ang Enhanced Community Quarantine sa syudad sang Iloilo kun sa diin gindumili-an ang pagbyahe sang mga pampubliko nga salakyan.
