ILOILO CITY – Ginpaathag sang Public Safety Transportation and Management Office (PSTMO) kun ngaa sila ang nagagamit sang pick up nga ginagamit sang Mayor’s Squad nga nabutang subong sa kontrobersiya.
Sa interview sang Bombo Radyo Iloilo kay PSTMO Head Mr. Jeck Conlu, iya ginpahayag nga duha ka pick up kag pito ka mga motorsiklo ang ginpamakal sang Iloilo City Government para kuntani sa Iloilo City Police Office (ICPO).
Apang ang duha ka mga pick up ang gin-ayo sang PSTMO sa alkalde nga gamiton sa ila operasyon bangud wala sila sang salakyan para sa ila Mayor’s squad.
Nagapanawagan man si Conlu kay Iloilo City Mayor-elect Jerry Treñas nga intindihon ang ila sitwasyon sa diin sila ang frontliner sang syudad sa tion nga may mga emerhensya kag kalamidad.
Gin-athag man ni Conlu nga antes pa man ang eleksyon, wala na sa ila poder ang pick up nga ginagamit sa Mayor’s squad.
