ILOILO CITY – Ginahitso na sang Public Safety and Transportation Management Office ang mga pagsulundan may kaangtanan sa byahe sang mga pump boat nga nagabyahe Iloilo-Guimaras vice versa.
Sa interview sang Bombo Radyo kay Jeck Conlu, pinuno sang Public Safety and Transportation Management iya ginpahayag nga ginmanduan na sila ni Iloilo City Mayor Jerry Treñas nga hitsuon ang mga pagsulundan agud mas mangin organisado ang mga pasahero sa terminal.
Ini matapos nga nagdinaguso ang mga pasahero sa labing una nga adlaw sang pagbalik sang byahe sang lunes, Mayo 18.
Suno kay Conlu lakip sa mga pagsulundan amo ang pag-agi sa quarantine protocol sang tanan nga gikan sa probinsya sang Guimaras kag magasulod sa syudad sang Iloilo.
Dugang sang natungdan, nagakadapat nga essential lang ang ila katuyuan sa pagpadulong sa syudad bangud posible sila nga pabalikon sa tion nga matukiban nga indi importante ukon pagpanglugayawan lang ang katuyuan nila sa pagsulod sa syudad.
Lakip man diri amo ang pagtsekyar sa temperatura sang mga pasahero, pagsulat sa health declaration card, pagsunod sang physical distancing, pagsuksok sang mask kag paglimita sa kapasidad sang mga pasahero nga maga sakay sa pumpboat.
Santo man sa pahayag ni Conlu, magadugang sila sang personnel nga amo ang magabantay sa mga puerto agud masiguro nga nagasunod ang tanan sa mga pagsulundan kag malikawan ang pagdinaguso.
May kaangtanan naman sa pagbalik sang byahe sang mga pumpboat padulong sa Guimaras, ginpahayag ni Conlu nga indi pa sya makasabat kun san-o ini ibalik bangud nagakinahanglan pa nga aprubahan ni Iloilo City Mayor Jerry Treñas ang mga pagsulundan nga ginhisugtan nila sang Guimaras Provincial Government.
