𝗜𝗟𝗢𝗜𝗟𝗢 𝗖𝗜𝗧𝗬 — Ginatun-an sang Iloilo City Public Safety and Transportation Management Office (PSTMO) ang mga pwesto sang pedestrian lanes sa syudad ilabi na ang malapit sa mga eskwelahan.
Sa interview sang Bombo Radyo kay Mr. Jeck Conlu, Cairman sang Committee on Engineering, Construction and Public Works, iya ginpahayag nga may yara sang kabug-usan nga 66 ka mga pedestrian lanes ang mga public schools sa Iloilo City.
Suno kay Conlu, unahon nga lantawon ang mga pedestrian lanes nga yara sa mga buluthuan bangud ini ang masami nga ginagamit kun ikumpara sa iban nga pedestrian lanes sa syudad.
Ginpahayag man sini nga nagapatuman na ang ila nga talatapan sang inventory para sa mga wala sang pedestrian lanes agud mangin preparasyon man sa pagbukas sang bag-o nga school year.
Dugang pa ni Conlu nga may mga kinahanglan nga i-redesign nga pedestrian lanes sa mga eskwelahan bangud wala nagasanto sa architectural structure.
Nagpasalig naman ang natungdan nga padayon ang ila nga inventory sa mga pribado nga eskwelahan kag commercial buildings kaangot sa pagbutang kag pag-redesign sang mga pedestrian lanes ilabi na sa lugar nga may madamo nga volume sang tawo.
