ILOILO CITY – Gin-athag sang Iloilo City Public Safety and Transportation Management Office (PSTMO) nga makasulod sa gihapon ang mga provincial jeepneys sa syudad apang asta gid lamang sa ila tagsa ka terminal nga nahamtang sa syudad.
Nahibaluan nga nagpabutyag sang kabalaka ang mga transport groups sa probinsya bangud sa gintukod nga Local Public Transportation Route Plan (LTPRP) sang syudad kag sa ila interpretasyon, indi sila makasulod sa syudad sang Iloilo.
Sa interview sang Bombo Radyo kay PSTMO head Mr. Jeck Conlu, iya ginpahayag nga wala sang tinutuyo ang syudad nga indi pagpasudlon ang mga provincial transport groups kag sa pagkamatuod, amo ini ang rason nga makapila ka beses nga gin-deny sang Department of Transporation (DOTR) ang application.
Dugang pa ni Conlu, ang mga pampasahero nga salakyan nga halin sa probinsya ang mahimo sa gihapon nga magdul-ong sang ila pasahero sa mga terminal nga nahamtang sa syudad kag mahimo man nga magpasakay sang pasahero sa sini nga mga terminal padulong sa ila banwa sa probinsya.
Santo sa guidelines sang DOTR sa paghimo sang LTPRP, indi mahimo nga may yara sang overlapping nga mga ruta.
Ginklaro man ni Conlu nga ang Marso 24, amo ang pagsugod palang sang LTFRB sang ila selection process para sa mga kooperatiba nga mag-apply sang franchise sa mga ruta nga yara sa LTPRP.
May patigayunon man nga pagsinapol bwas angut sa sini nga issue.
Samtang, nagpasalamat naman si Sangguniang Bayan Member Pyt Trimañez, chairman sang Committee on Transportation sang Sangguniang Bayan sang Pavia, Iloilo sa nangin paathag ni Mr. Jeck Conlu angut sa LPTRP.
Sa interview sang Bombo Radyo Iloilo kay Trimañez, ipaathag niya ang nasambit nga development sa pagsinapol upod ang mga transport groups.
Hitsuhon nalang sang banwa ang ila transport plan nga magasanto sa LTPRP sang syudad.
