ILOILO CITY – Ginkumpirma sang Public Safety and Transportation Management Office nga may nagdungka sa syudad sang Iloilo nga passenger vessel halin sa Palawan.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga 9:00 kaina sang aga sang nag-abot sa syudad sang Iloilo ang MV Milagrosa J Singko kun sa diin may yara ini sang sakay nga 69 nga pasahero kag 33 ka crew.
Suno kay Conlu, ang nasambit nga barko ang halin sa Puerto Princesa padulong sa Cuyo, Palawan padulong sa Iloilo kag sa Cebu naman ang exit point.
Ginpahayag ni Conlu nga kalabanan sa mga pasahero sang barko ang taga probinsya kag syudad sang Iloilo kag bangud nga wala pa man sang positibo nga kaso sang Coronavirus Disease 2019 (COVID-19) sa Palawan, ginpahanugutan na lang ang mga pasahero nga makapauli sa ila tgasa ka mga lugar.
May isa ka foreign national suno kay Conlu nga temporaryo anay nga ginpatinir diri sa syudad sang Iloilo bangud nga ginsirado ang mga pantalan sa Cebu bangud sa COVID-19 threat.
Ang nasambit nga foreign national ang nag-abot sang Pebrero 25, nagbakasyon sa Palawan kag sa subong, natalana na kun tani nga magpauli sa San Francisco, California.
Ang nasambit nga barko suno sa natungdan ang pinaka-ulihi nga barko nga ginpahanugutan nga makadungka sa syudad sang Iloilo kun sa diin epektibo subong nga adlaw ang community quarantine.
Kadungan sini, nagapadayon naman ang pagpatigayon sang Public Safety and Transportation Management Office sang misting sa mga Public Utilitry Jeepney nga nagabyahe sa syudad bilang kabahin sang preventive measures agud nga indi na maglapta ang virus.
