Ginpasiguro sang Public Safety and Transportation Management Office (PSTMO) nga mangin manageable ang volume sang mga pasahero nga magahalin sa probinsya kag amo man magahalin sa syudad sang Iloilo sa tion nga ipatuman na ang Local Public Transport Route Plan (LPTRP) sa Iloilo City sa Hunyo 12.
Sa interview sang Bombo Radyo kay Mr. Jeck Conlu, pinuno sang PSTMO, iya ginpahayag nga sa ila ginplastar nga plano, ang unloading area sang mga pasahero halin sa probinsya ang ipahamtang sa Ungka – ITGSI Terminal samtang ang unloading area naman sang mga pasahero halin sa Iloilo City ang ipahamtang sa Pavia People’s Terminal.
Suno kay Conlu, may arrangement man nga ang mga bus halin sa probinsya ang magadiretso sa Pavia People’s Terminal para magpapanaog kag magpasaka sang pasahero.
Pahayag ni Conlu, ini nagakahulugan nga indi matam-an ang pagdagsa sang mga pasahero sa mga terminals kag malikawan man ang pag-impunanay sang city-bound kag province-bound passengers.
Nadula man ang kahangawa sang mga pasahero halin sa probinsya sang Iloilo sa tion nga mapatuman na ang LPTRP.
Sa interview sang Bombo Radyo Sangguniang Bayan Member Pyt Trimañez sang Pavia kag chairman sang Committee on Transportation sa konseho sa amo nga banwa, iya ginpahayag nga sa ginpatigayon nga pagsinapol upod sa mga concerned agencies kag stakeholders sa probinsya kag syudad sang Iloilo, ginpasiguro sa mga pasahero halin sa probinsya nga may yara sang maga-cater sa ila halin sa mga terminal pasulod sa syudad.
Suno kay Trimanez, sa subong ila ginaulikdan ang mga jeepney drivers halin sa banwa sang Pavia nga mautdan sang ruta kag maapektuhan ang ila kita.
Pahayag sang opisyal, ila sapulon ini nga mga drivers agud maistoryahan kun paano sila mabuligan agud indi man sila matam-an sa epekto sang LPTRP.
