ILOILO CITY – Ginplastar na sang Public Safety and Transportation Management Office ang traffic plan sa palibot sang Iloilo Terminal Market kadungan sang pag-amat-amat na saylo sang mga vendors agud nga maghatag ligwa sa rehabilitation sang merkado.
Sa interview sang Bombo Radyo kay Mr. Jeck Conlu, pinuno sang talatapan, iya ginpahayag nga duha ka mga teams ang gin-deploy sa amo nga merkado nga ginalakipan sang standby personnel kag apprehension team.
Ang standby personnel ang mga traffic aides nga madugay na nga gin-assign sa lugar kag ang apprehension team amo ang mga nagapanakop sang violations.
Suno kay Conlu, manageable sa gihapon ang trapiko sa lugar magluwas lamang kun rush hours.
Nagpanugyan man ang natungdan sa mga nagadala sang dalagko nga truck nga likawan ang pag-agi sa portion sang Mabini Street kun magsulod sa merkado bangud nga may guba nga drainage nga nagapapugok sang trapiko.
Napalab-ot naman ang problema sa Iloilo City District Engineering Office.
Samtang, ang mga provincial jeepneys naman ang nagapwesto sa Tanza Bonifacio kag isa lamang ka unit sa tagsa ka banwa ang ginapahanugutan nga magdul-ong sa merkado.
