ILOILO CITY – Duha ang requirements nga dapat dal-on sang mga Guimbalanon agud nga makapadulong sa syudad sang Iloilo.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga apisar ginbawi sang Department of Health ang deklarasyon batok sa Guimbalanon apang istrikto sa gihapon nga ipatuman ang border restrictions.
Suno kay Conlu, nagakadapat nga may yara sang Barangay Home Quarantine Pass kag Identification Card agud nga magasulod sa syudad apang wala diri nalakip ang mga residente sang duha ka barangay kun sa diin naghalin ang mga nagpositibo sa Coronavirus Disease 2019 (COVID-19).
Ginpahayag ni Conlu nga indi gid pagpahanugutan nga makasulod sa syudad sang Iloilo ang mga residente sang duha ka mga barangay nga wala na niya ginhingadlan.
Ang mga residente gikan sa duha ka barangay suno sa natungdan ang kinahanglan nga magpaidalom sa 14-day home quarantine.
