Nagapangayo sang paghangop ang Public Safety and Transportation Management Office (PSTMO) sa publiko bangud sa huol sa trapiko nga dulot sang taping kag recording sang Dinagyang tribes nga amo ang igapresentar para sa Digital Dinagyang 2021.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga may “inconvenience kag congestion” matuod nga dulot ini nga taping kag recording apang madasig lang bangud naga-pull out man sila gilayon kun matapos na ang shooting.
Sa maabot nga Enero, wala na sang closure nga matabo sa mga dalanon suno kay Conlu bangud wala man sang dugang pa nga shooting nga himuon bangud mahitso na ini antes matapos ang tuig 2020.
Gin-ako man sang Iloilo Festivals Foundation Incorporated (IFFI) nga may “discomfort” nga dala ang taping, recording, kag practice sang mga tribu.
Sa interview sang Bombo Radyo kay Atty. Joebert Peñaflorida, presidente sang Iloilo Festivals Foundation Incorporated (IFFI), iya ginpahayag nga wala ginsapubliko ang schedule sang amo nga shooting bangud indi nila luyag nga dugukan ini sang tawo bangud mahimo malapas ang mga minimum health protocols batok sa COVID-19.
Paathag ni Atty. Peñaflorida, nag-umpisa ang taping sang Nobyembre 28 sa iban nga mga distrito kag matapos na bwas, Disyembre 18.
Suno kay Peñaflorida, naga-coordinate man sila sa Iloilo City Police Office (ICPO) kag sa Transportation Management and Traffic Regulation Office agud nga makontrol ang dalagan sang mga salakyan.
