ILOILO CITY – Magapungko ang Public Safety and Transportation Management Office (PSTMO) kaupod ang transport sector pagkatapos sang Dinagyang Festival 2020 agud istoryahan ang mga dapat pasanyugon sa implementasyon sang ‘Traffic Discipline Zone’ sa Sen. Benigno Aquino Jr. Avenue, Mandurriao, Iloilo City.
Ini matapos nga ginpahayag sang Iloilo City Loop Alliance of Jeepney Owners and Drivers Association (ICLAJODA)nga makaluluoy ang mga jeepney drivers bangud nga ginlimitahan ang loading kag unloading areas sa 14-kilometer stretch sang Diversion Road, rason nga nagapangakig ang mga pasahero.
Sa interview sang Bombo Radyo kay PSTMO Head Jeck Conlu, iya ginpahayag nga baliskad sa ginreklamo sang transport sector nga duha lang ang palanaugan kag balantayan sang jeep sa Traffic Discipline Zone, may yara sang ipahamtang nga 26 ka mga loading kag unloading bays sa amo nga lugar.
Gin-athag ni Conlu nga sa kada bay, may ipahamtang man nga waiting shed; buot silingon, 26 angloading kag unloading bays, 26 man ang waiting sheds.
May distansya suno kay Conlu nga gina-observe ang otoridad sa kada palanaugan sang pasahero, apang sa Lunes pa niya ini mahibaluan bangud padayon pa ini nga ginatakos sang iban nga personnel.
Indi man manegar suno sa natungdan nga santo sa una nga mga inadlaw sa pag-implementar sang programa, may mga na-obserbahan nga tuman ka populated ukon pagpugok sang mga pasahero sa iban nga loading kag unloading bay.
Ini, kag madamo pa, suno kay Conlu ang istoryahan sa tion nga matapos na ang masako nga schedule kaangot sa Dinagyang Festival 2020.
Lauman man suno sa opisyal nga sa masunod nga semana, mabutang na ang mga signage agud indi na magtalang-talang ang mga pasahero.
