ILOILO CITY – Liwat nga nagpanindugan ang Public Safety and Transportation Management Office nga wala sang problema sa plano nga pagpasaka sang penalidad sa mga traffic violation sa syudad.
Sa ginpatigayon nga committee hearing sang nagligad nga semana, hugot nga ginapamalabagan sang transport sector ang plano nga pagpasaka sang penalidad.
Sa interview sang Bombo Radyo kay Mr. Jeck Conlu, pinuno sang talatapan, iya ginpahayag nga kabahin sang proseso sa pagdisiplina sa driver ang penalidad kun may ginlapas sila nga layi sa dalanon.
Suno kay Conlu, wala man sang dapat nga kahadlukan kun indi maglapas sa layi.
Pahayag dugang sang natungdan, kun magpadulong gani sa iban nga lugar ang Ilonggo, tuman ang kakulba nila nga magkomiter sang sala bangud nga tuman ka taas sang penalidad.
Dugang pa niya, ang pagpasaka sang penalidad ang makabulig man sa pagpahagan-hagan sang trapiko sa syudad bangud nga ang traffic violations ang nagapadugang sa pagpugok sang trapiko.
Base sa record sang opisina, 25, 177 ang mga violators sang nagligad nga tuig kun sa diin, kalabanan sang ila violations amo ang obstruction kag illegal parking.
