ILOILO CITY– Madamo nga mga tricycle kag traysikad driver ang nadakpan sang Public Safety and Transportation Management Office sa ginpatigayon nga road clearing operations.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga nagdangat sa 24 ka mga traysikad kag 15 ka tricycle driver ang ila gindakop.
Suno kay Conlu, kalabanan sa mga nagkaladakpan amo ang kolorum nga tricycle kag ang iban ang ginbilin sang driver sa higad sang dalan.
Gin-impound ang mga tricycle samtang ang iban sa mga driver ang ginhatagan sang ticket of violation.
Padayun man suno sa natungdan ang ila pagpatuman sang color coding sa mga nagabyahe nga tricycle sa palibot sang syudad.
Ginpahayag man ni Conlu nga nakasapol na sila ni Liga ng mga Barangay President Irene Ong nga iga-deputize ang mga punong barangay sa syudad agud makapangdakop sa mga pasaway nga driver.
Sa ila naistoryahan ni Ong, kun sin-o lang nga barangay official nga maluyag i-deputize, amo lang ang hatagan sang prayoridad.
Magapakig-angot pa sila sa City Legal Office kun nagakinahanglan pa sang executive order ukon ordinansa ang pag-deputize sa mga barangay official.
