ILOILO CITY – Magapadayon sa gihapon sa pag-confiscate sang driver’s license ang mga traffic aides sa syudad samtang nagahulat pa sang sabat nagikan sa Iloilo City Legal Office.
Ini ang may kaangtanan sa ginpagwa nga opinyon sang Department of Justice nga nagasuporta sa joint memorandum circular sang Department of Transportation and Communication kag sang Department of the Interior and Local Government nga wala nagapahanugot sa local government units sa pag-confiscate sang lisensya sang mga violators.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga wala sang desisyon nagikan sa korte nga nagadeklarar sa ordinansa nga invalid.
Dugang pa niya, opinyon lang ini sang Department of Justice kag indi maka-supersede sa local ordinance.
Pahayag niya dugang, base sa Local Government Code, mahimo nga magdihon sang lokal nga layi ang mga local government units.
Suno pa kay Conlu, magasunod lamang sila sa mandu ni Iloilo City Mayor Jerry Treñas bangud nga ang alkalde ang nagapamuno sa ila.
