ILOILO CITY – Magasapol ang Public Safety and Transportation and Management Office (PSTMO) sa Land Transportation Franchising and Regulatory Board (LTFRB) kag Land Transportation Office (LTO) may kaangtanan sa paglapas sang Public Utility Vehicles (PUVs) sa physical distancing kag iban pa nga minimum health protocol.
Sa exclusive interview sang Bombo Radyo kay Conlu nga amo ang nagaserbe nga pinuno sang Public Safety and Transportation Management Office kag spokesperson sang COVID-19 Team sang Iloilo City Government, iya ginpahayag nga huwebes nga adlaw, Enero 14, patigayunon ang nasambit nga pagsinapol.
Katuyuan sang sini nga pagsinapol suno kay Conlu amo nga matagaan sa liwat sang igtalupangod ang mga drivers sang pampubliko nga salakyan sa syudad sang Iloilo natuhoy sa pagsunod sang nasambit nga health protocols.
Suno kay Conlu, mas may poder ang LTO kag LTFRB nga magsaway sa mga drivers agud hugot nga mapatuman ang mga pagsulundan.
Gin-athag ni Conlu nga nagakadapat nga sundon sa gihapon ang 1 meter physical distance sa sulod sang mga pampubliko nga salakyan kag i-disenfect kada-adlaw ang mga barriers.
Apang suno kay Conlu, daw kaangay nga nangin kampante na ang mga jeepney operators sa karon.
“Wala gid na maintain sang aton nga mga operators nga supposedly, dapat ginadisenfect man na sa, ginatrapuhan mo ang mga barriers, so mamaintain mo ang ka-tinlo gid ya..so posible nga nagrelax man ang aton nga mga operators with regards sa pagmaintain sini,” pahayag ni Conlu.
Nagpaandam man ang natungdan sa mga drivers nga magahiwat sang random check ang PSTMO kun bala ginasunod sang mga PUVs ang pagpahamtang sang barriers kag minimum health protocols.
