ILOILO CITY – Magapatuman lamang ang Iloilo City Public Transportation and Management Office sa tanan nga ordinansa sa syudad.
Ini ang may kaangtanan sa plano ni Iloilo City Councilor Romel Duron nga amyendaran ang Regulation Ordinance No. 338 ukon ang pagpahanugot sa mga traffic aides kag kapulisan nga mag-confiscate sang driver’s license.
Sa interview sang Bombo Radyo kay Mr. Jeck Conlu, pinuno sang talatapan, iya ginpahayag nga magasunod sila sa tion nga amyendaran sang city council ang ordinansa.
Liwat naman nga nagpanidugan si Conlu nga magapadayon sa gihapon sa pag-confiscate sang driver’s license ang mga traffic aides sa syudad apisar sa ginpagwa nga opinyon sang Department of Justice nga nagasuporta sa joint memorandum circular sang Department of Transportation and Communication kag sang Department of the Interior and Local Government nga wala nagapahanugot sa local government units sa pag-confiscate sang lisensya sang mga violators.
Pahayag pa ni Conlu, mangin ang traffic management offices sa iban nga local government units ang naga-confiscate man sang drivers license.
Suno kay Conlu, kuntani, ang national government ang maga-initiate man agud nga ma-harmonize ang mga pagsulundan sa trapiko.
Nahibaluan nga ginpahayag ni Duron nga tion na para i-repaso ang ordinansa agud i-reconcile ang tensyon sa tunga sang mga motorista kag traffic aides.
Suno kay Duron, sa baylo nga i-confiscate ang driver’s license, maayo kuntani nga gamiton na lang mga valid identification kag government documents bangud tinutuyo lamang sini nga makuha ang identity sang driver.
