ILOILO CITY – Tatlo ka mga alternatibo nga solusyon ang igapatuman sang Public Safety and Transportation Management Office (PSTMO) agud nga malikawan ang aksidente sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Mr. Jeck Conlu, pinuno sang PSTMO, iya ginpahayag nga ginduso ni Iloilo City Mayor-elect Jerry Treñas nga pahamtangan sang PSTMO personnel ang nasambit nga dalan nga kilala man nga Diversion Road, ilabi na sa Esplanade area, sa atubang sang Plazuela de Iloilo tubtub sa ginaliku-an sa Pison Avenue.
Magluwas diri, igapagamit ang overpass sa lugar agud nga indi na magtabok sa dalan ang mga tawo.
Siraduhon man ang u-turn slot sa Sen. Benino Aquino Jr. Avenue kag Pison Avenue suno kay Conlu agud nga mahagan-hagan ang dalagan sang trapiko.
Ginpahayag ni Conlu nga magabantay ang PSTMO personnel tubtub nga mabutangan na sang steel railings ang tunga sang dalan kag tubtub nga maanad na ang tawo sa nasambit nga sistema.
Sa subong, ginpahayag sang pinuno sang PSTMO nga ang underpass nga nagaangot sa Esplanade 1 kag Esplanade 1 Annex with skate rinks ang indi maagyan ilabi na kun nagataob.
Ini bangud nga nalab-ot sang tubig ang bricks nga sa subong, nalumutan na kag madanlog kun agyan.
