ILOILO CITY- Nabatun na sang pamunuan sang Public Safety and Transportation Management Office ang memorandum nga ginpapanaog ni Iloilo City Mayor Jerry Treñas may kaangtanan sa pagpanghawan sang national roads sa syudad sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office , iya ginpahayag nga igapatawag na niya ang mga punong barangay sa pagsinapol agud istoryahan ang nagakadapat nga buhaton ilabi na kun may yara sang mga road obstruction sa ila barangay.
Suno kay Conlu, nag-umpisa na sila sa paglibot subong nga adlaw tubtob sa buwas agud lantawon ang mga dalanon sa syudad nga may madamu sang obstruction.
Bilang kabahin sang pagpanghanda suno kay Conlu, ila man ginapreparar ang mga salakyan, trucks kag iban pa nga kinahanglanon sa pagpanghawan sang dalan sa syudad.
Nagpasalamat man ang natungdan kay Mayor Treñas bangud indi lang instruction ang ginhatag sa ila kundi naplastar ang mga nagakadapat buhaton kag kun ano ang mga kinahanglanon.
Makabig man suno kay Conlu nga obstruction sa dalan ang naga illegal parking kag ang iligal nga mga istruktura.
Pagasiguraduhon naman nila suno kay Conlu nga indi na magbalik pa ang obstruction sa dalan.
