ILOILO CITY – Nagpalab-ot sang bulig ang Public Safety and Transportation Management Office sa driver nga gin-ticketan sang ginapahayag personnel sang Land Transportation Office bangud sa pagpasakay sang duha ka pasahero nga wala nagasuksok sang face shield.
Sa interview sang Bombo Radyo kay Public Safety and Transportation Management Office head Jeck Conlu, iya ginpahayag nga tuman ka bug-at ang multa nga P2,000 nga ginahatag sa mga driver may kaangtanan sa violation nga reckless driving.
Suno kay Conlu, bilang pinuno sang Public Safety and Transportation Management Office, indi niya mabasol ang Land Transportation Office may kaangtanan sa pagpatuman sang mandatory nga pagsuksok sang face shield sa pagsakay sa mga pampubliko nga salakyan bangud nga ang ginabasehan amo ang Joint Circular Order sa tunga sang Land Transportation Franchising and Regulatory Board.
Ginpahayag ni Conlu nga siya na lang ang nagbayad sang P2,000 nga multa sang driver kun sa diin sa subong nga may pandemya, iya man nahangpan nga tuman ka pigado ang kita sa pagbiyahe sang jeep.
Samtang, tuman naman ang pagpasalamat sang driver sa bulig nga iya nabaton.
Sa interview sang Bombo Radyo sa driver nga nagpahinago lang sang pangalan, iya ginpahayag nga nadakpan siya sa una nga adlaw sang pagpatuman sang mandatory nga pagsuksok sang face shield.
Matapos nadakpan kag nahatagan sang ticket bangud sa reckless driving nga violation, ginpahayag sang driver nga wala na siya nakabyahe bangud nga wala nagawad ang iya lisensya.
Sa pagkamatuod suno sa driver, naga-porsyento lamang siya sa iya tiyo kag kun kaisa, wala na siya sang porsyento nga nahatag bangud sa tuman ka gamay nga kita.
Sa baylo nga ang mga driver, ang pasahero kun tani suno sa natungdan amo ang hatagan sang violation bangud sa indi pagsuksok sang face shield samtang nagasakay sa depampasahero nga salakyan.
Ginpanindugan man sang natungdan nga nakasuksok sang face shield ang duha ka pasahero sang nagsaka sa jeep apang mahimo nga ila ini nga ginkakas bangud sa tuman ka baskog nga huyop sang hangin samtang nagabiyahe.
