ILOILO CITY – Lauman nga matumod na sang Public Safety and Transportation Management Office (PSTMO) ang partikular nga adlaw sa paglunsyar sang Traffic Discipline Zone sa Sen. Benigno Aquino Jr. Avenue, Mandurriao, Iloilo City kun matapos na ang Opening Salvo sang Dinagyang Festival 2020.
Sa interview sang Bombo Radyo kay PSTMO Head Jeck Conlu, iya ginpahayag nga tuman kadamo ang obligasyon sang nasambit nga pamunuan kag sang Philippine National Police (PNP) subong nga Enero ilabi na bangud asud-asud ang mga aktibidad kaangot sa selebrasyon sang Dinagyang.
Sa pihak sini, pahayag ni Conlu, umpisahan na sang pamunuan ang pag-implementar sang Traffic Discipline Zone paagi sa information dissemination ukon educational campaign.
Suno kay Conlu, wala nagakahulugan nga sa mismo adlaw sang implementasyon sang Traffic Discipline Zone, gilayon na nga magapanakop ang mga opisyal.
Dugang pa sang natungdan, ang educational campaign nga himuon ang may tinutuyo nga mapasangkad pa ang programa indi lamang sa mga motorista kundi sa mga pasahero.
Suno kay Conlu, daku ini nga pagpanghangkat sa mga lead agencies — Land Transportation Office (LTO), Highway Patrol Group (HPG), PNP, kag PSTMO– ilabi na bangud nanuhay-tuhay ang personalidad sang naga-agi sa lugar.
KAGAMITAN.
Samtang, kaangot sa equipment ukon kagamitan nga sarang magamit sang otoridad sa mas maayo nga implementasyon sang Traffic Discipline Zone, ginpahayag ni Conlu nga may yara suplay ang syudad apang indi ini bastante.
Apisar sini, i-monitor gihapon sang otoridad kun sin-o ang nagalapas sa mga pagsulundan lakip na ang Anti-Modified Muffler Law, Anti-Drunk/Drugged Driving Act, Anti-Distracted Driving Act, speed limit kag iban pa.
Suno kay Conlu, sa bahin sang Anti-Drunk/Drugged Driving Act, indi man gilayon nga mangpara ang mga opisyal agud ma-test ang driver gamit ang breath analyzer.
Kinahanglan suno sa opisyal nga may yara anay sang makita nga probable cause kaangay sang naga-ekis ekis nga salakyan ukon naga-overspeeding.
DESIDIDO SA IMPLEMENTASYON.
“We can’t fail on this,” pahayag ni Conlu kaangot sa kun daw ano ka desidido ang Iloilo City Government sa pagpatigayon sang amo nga programa.
Suno kay Conlu, determinado si Iloilo City Mayor Jerry Treñas sa pagpatuman sini kag amo man ang mga lead agencies.
Dugang pa sang natungdan, ini ang perpekto nga tion agud madisiplina na ang mga motorista kag pedestrians.
