ILOILO CITY – Wala pa sang may nabaton nga written guidelines gikan sa Department of Interior and Local Government ang Public Safety and Transportation Management Office tuhoy sa pagpatuman sang clearing operations sa mga major roads sa syudad sang Iloilo.
Ini ang may kaangtanan sa mandu ni Presidente Rodrigo Duterte nga dapat kuhaon ang tanan nga obstruction sa dalan nga nagatuga sang pagpugok sang trapiko.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga wala pa siya sang may nabaton nga memorandum circular nga nagamandu sa tanan nga Local Government Units nga dapat hawanan ang tanan nga major roads gikan sa mga obstruction sa sulod sang 45 ka adlaw.
Suno kay Conlu, bisan nga wala pa siya sang may nabaton nga written guidelines apang may yara naman sang memorandum nga ginpaguwa ni Iloilo City Mayor Jerry Treñas nga dapat umpisahan na ang clearing operations.
Sa subong suno sa natungdan, naga-umpisa na ang clearing operations sa mga mayor nga dalanon sa syudad sang Iloilo.
Nahibalu-an nga sa tion nga mapaslawan ang mga local chief executives nga mapatuman ang nasambit nga mandu, sila ang iga-suspend sa serbisyo.
