Wala sang ideya ang pamunuan sang Public Safety and Transportation Management Office (PSTMO) kun diin na padulong ang Intelligent Transport System (ITS) nga ginproponer sadto ni anay Iloilo City Mayor Jed Patrick Mabilog bilang sabat sa mga problema sa trapiko kag disgrasya sa mga dalanon sang syudad.
Sa interview sang Bombo Radyo Iloilo kay Mr. Jeck Conlu, pinuno sang PSTMO, iya ginpahayag nga wala pa siya sang ihibalo kun ano ang mangin kapalaran sang nasambit nga proyekto kag kun diin nagkadto ang P25M nga pondo nga gintigana sang Iloilo City Government.
Apang suno kay Conlu, sa iya pagkahibalo, ginre-align ang nasambit nga pondo.
Nahibaluan nga ang ITS nagalakip sang paggamit sang closed-circuit television camera nga makatumod sang kadasigon sang salakyan ukon naga-overspeed kag ginarecord ini.
Apang sang gindismiss sa serbisyo si Mabilog, ginhold sang nagbulos sa iya nga si Mayor Jose Espinosa III ang nasambit nga proyekto.
Sa subong, plano naman ni Mayor- elect Jerry Treñas nga dayunon ang proyekto.
