Ginpahayag sang isa ka psychology expert nga ang wala sang closure sa isa ka relasyon ang mahimo makaapekto sa mental health kag pagsalig sang isa ka tawo sa iya kaugalingon, ilabi na kon padayon niya nga gina-question ang iya bili matapos nga ginbayaan lang.
Sa interview sang Bombo Radyo kay Ms. Rona Alegria Luz-Vallejo, isa ka licensed psychologist kag psychometrician, iya ginpaathag nga kon wala sang klaro nga rason ukon explanation sa pagbulagay, mahimo nga pamangkuton sang tawo nga ginbayaan lang ang iya kaugalingon kon kulang bala siya ang may nahimo nga sala nga nagtulod sa iya partner nga magbiya.
Suno kay Vallejo, ang padayon nga pagbatyag sang kasakit kag stress ang mahimo magresulta sa problema sa tulog, pagbag-o sang mood kag pagkadula sang self-confidence sang isa ka indibidwal.
Pahayag pa niya, mahimo man nga magbalik-balik ang kasakit sang ila nagligad nga mga eksperyensya sang pagbiya ukon pagsikway, nga dugang nga makaapekto sa ila mental well-being.
Apang, ginpahayag sang psychologist nga importante nga dumdumon sang kada tawo nga ang ila bili wala nagadepende sa tawo nga nagbiya sa ila.
Ginpahanumdom niya nga indi dapat kalimtan ang kaugalingon bangud lamang sa sobra nga pagpalangga sa iban, ilabi na kon wala man ini gina-reciprocate sang pareho nga pagpalangga kag pagrespeto.
Dugang pa nga ginarekomendar sang eksperto nga magpokus ang mga tawo sa mga butang nga ara sa ila kontrol kag hatagan sang tion ang ila kaugalingon nga mag-ayo kag magpadayon.
