Wala pa sang data nga nagapakita sang severe ukon dako nga side-effect sang COVID-19 vaccine sa lawas sang tawo.
Sa interview sang Bombo Radyo kay Dr. Philip Ian Padilla, public health expert kag Vice Chancellor for Academic Affairs sa University of the Philippines -Visayas, iya ginapahayag nga wala sang kamatuoran ang huring-huring nga magapositibo sa COVID-19 ang isa ka indibidwal nga nabakunahan na batok sa amo nga virus.
Apang posible suno sa iya nga makaeksperyensya sang mild allergic reaction ang isa ka-tawo nga nakabaton sang COVID-19 vaccine.
Suno kay Padilla, sa kaso sang mga tawo nga napatay bangud sa COVID-19 apang nakabaton na sang first dose ukon fully vaccinated na batok sa virus, posible nga wala pa nagdevelop ang antibodies kag nalatnan ang mga ini sang nasambit nga balatian.
Ini ang rason suno sa health expert nga nagakadapat doble ang paghalong sang tanan apisar nakabaton na sang COVID-19 vaccine bangud wala sang ginapili nga panahon ang paglapta sang amo nga balatian.
Nagakadapat man suno kay Padilla nga sa mga kaso sang napatay nga pasyente bangud sa virus, imbestigaran sang maid-id sang Department of Health ang kabug-usan nga rekord sang pasyente, petsa sang pagpaidalom sa pagpabakuna, kag kun ano pa ang underlying health conditions sini.
Abiso sang natungdan sa mga indibidwal nga nagpabakuna batok sa COVID-19 apang nakaeksperyensya sang pila ka mga side effect, nagakadapat nga gilayon nga magpahibalo sa Barangay, sa City Health Office ukon sa Rural Health Unit.
Sa sini nga pamaagi suno sa iya, mapahibalo man sang mga otoridad ang pila ka mga pharmaceutical company may kaangtanan sa side effects sang ila mga ginmanufacture nga COVID-19 vaccines agud mas makahatag sang mas epektibo nga bakuna para sa tanan.
Apang gin-athag ni Padilla nga sa subong, wala pa sang data nga nagapamatuod nga may kabangdanan ang COVID-19 vaccine sa kamatayon sang isa ka pasyente.
