Ginakabig sang isa ka public health expert nga isa ang breast cancer sa pinaka-common nga balatian nga nagaigo sa pila ka mga Filipino nga masami nagatuga man sang ila kamatayon.
Sa interview sang Bombo Radyo kay Dr. Robert Alfabeto, isa ka surgeon, iya ginpahayag nga nagapanguna ang breast cancer nga balatian nga ginasuprer sang kababainhan sa pungsod, samtang prostate cancer naman para sa kalalakihan.
Suno kay Alfabeto, ika-tatlo ang breast cancer sa mortality rate nga nagatuga sang kamatayon sa mga tawo ilabi na diri sa Pilipinas.
Nagpanugyan man ang natungdan sa kababainhan sang early detection sang breast cancer, nga mahimo sundon ang Breast Self-Examination paagi sa paglantaw kag paghikap sang dughan.
Para sa mga naga-edad sang 20 anyos pataas, mahimo nga magpatigayon sang Breast Self-Examination, 2 tubtub 3 ka adlaw matapos ang menstruation kag para naman sa mga wala na sang matres kag nagmenopause na, mahimo nga magpatigayon sang Breast Self-Examination sa una nga adlaw sang tagsa ka bulan.
Sa tion nga may makita nga pagbag-o ukon may mahikapan nga bukol sa suso ukon sa palibot sang dughan, gilayon nga magpakig-angot sa doktor para sa nagakaigo nga medical attention.
