ILOILO CITY- Mas delikado sa ikaayong lawas ang pagpatigayon sang indoor campaign activities kun ipaanggid sa outdoors may kaangtanan sa ginapatigayon nga pagpangampanya sang mga national candidates para sa May 2022 elections sa tunga sang pandemya.
Sa interview sang Bombo Radyo kay Dr. Philip Ian Padilla, public health expert, iya ginpahayag nga napamatud-an na nga mas mataas ang risgo sang paglatnanay sang COVID-19 kun yara ini sa close nga area bangud nga limitado lang ang sirkulasyon sang hangin.
Suno kay Dr. Padilla, apisar outdoor ang activity, importante man sa gihapon ang pagtuman sa minimum health protocol.
Dugang niya, indi man dapat nga magkampante ang mga supporters sang mga kandidato nga nagatililipon sa rally bangud apisar nga may downtrend subong sang kaso sang balatian, mahimo nga magtimbuok ini liwat kun indi masunod ang protocol.
