Iloilo City – Pabor ang isa ka public health expert sa ginaduso nga pagpahugot sang border control sa mga nagasulod nga Chinese sa Pilipinas para indi madalasa ang Pilipinas sa panibag-o nga surge sang COVID-19 sa China bangud sa bag o nga variant.
Sa interview sang Bombo Radyo kay Dr. Philip Ian Padilla, isa ka public health expert, iya ginpahayag nga bangud sa herd immunity sang China, nagtaas ang mga kaso sang nagasuprir sang COVID 19.
Suno kay Dr. Padilla, ang immunity sang mga residente sang China ilabi na sa mga metropolitan centers ang indi mabaskog pati man ang vaccination protocols ang indi mataas bangud man sa pagdepende sa Zero COVID policy rason nga nagadamo pa gid ang kaso sang nasambit nga balatian.
Dugang ni Padilla, isa man ka problema ang pagsekreto sang Chinese government tuhoy sa genetic composition sang bag-o nga virus, rason nga wala sang data nga ginasundan ang kalabanan nga mga research institutes.
Matandaan nga ang una nga kaso sang COVID-19 ang nareport sang Disyembre 2019 sa Wuhan, China.
