ILOILO CITY- Wala ginarekomendar sang isa ka public health expert nga himuon na lang nga optional ang paggamit sang face mask sa open spaces ukon well- ventilated nga lugar.
Ini kasunod man sang tikang sang Cebu Provincial Government nga pag-isyu sang executive order nga nagasiling nga optional na lang ang pagsuksok sang face mask.
Sa interview sang Bombo Radyo kay Dr. Philip Ian Padilla, Vice Chancellor for Academic Affairs sang University of the Philippines Visayas, iya ginpahayag nga base sa data sang Department of Health (DOH),may gamay nga pagsaka sa kaso sang COVID-19 infection kag posible nga madugangan pa ini.
Suno kay Padilla, apisar nga mangin optional ang pagsuksok sang face mask sa open spaces apang kun wala nagasunod sa physical distancing, mahimo sa gihapon nga may matabo nga infection.
Dugang pa ni Padilla, isa man sa rason amo ang vaccine coverage kun sa diin apisar nga tubtob 80% na ang nabakunahan, apang may iban nga mga Local Government Units nga may manubo sa gihapon nga vaccination rate.
