Ginpatigayon sa Iloilo City subong nga adlaw, Oktubre 9, ang ikatatlo nga public hearing kaangot sa ginaduso nga minimum wage increase sa pribado nga sektor sa Western Visayas.
Ginpangunahan ini sang Department of Labor and Employment (DOLE) Regional Tripartite Wage and Productivity Board (RTWPB) 6 kag gintambungan sang labor sector kag mga tiglawas sang nanuhay-tuhay nga mga negosyo halin sa Iloilo, Antique, kag Guimaras.
Sa amo nga pagtilipon, may mga nagaduso sang P40 tubtub P60 kada adlaw nga saka sang sweldo kag may ara man nga yara sa tunga-tunga ukon P50.
Sandig sa DOLE 6, may mga nagpalab-ot man nga i-postpone lang anay ang pagpasaka sa sweldo sa Rehiyon VI, kag ipatuman na lang sa masunod nga tuig.
Ginpresentar man ang data sang mga ahensya sang gobyerno kaangay sang DOLE, Department of Trade and Industry, kag Department of Economy, Planning, and Development (DEPDev).
Sa interview naman sang Bombo Radyo kay Mr. Elmer Forro, Secretary General sang Bayan Panay, iya ginpahayag nga ginaduso nila ang P250 increase sa daily minimum wage sang private-sector workers.
Kun ma-implementar ini, magasaka sa P800 ang sweldo sa Rehiyon VI kag ginalantaw nga makabulig sa mga mamumugon nga makasalbar man sa inflation, krisis sa enerhiya, gatong, kag kuryente, kag madamo nga iban pa.
Dugang sini, nakit-an nila nga valid man ang concerns sang Micro, Small, and Medium Enterprises (MSMEs), apang indi ini dapat mangin rason agud nga indi pagpamatian ang ginapanawagan nga wage increase.
“Both agreed nga pareho nga biktima ang MSMEs and ang workers. Both agreed also nga magbuligay sa pag-demand sa accountability sa gobyerno. Kinahanglan ang decisiveness na kag intervention para nga mabuligan ang MSMEs nga mapataas ang ila kapasidad nga makahatag sang matarong nga sweldo sa ila mamumugon,” dugang niya.
Wala pa subong sang ginhatag nga eksakto nga figure kun pila ang increase nga ipatuman sa Western Visayas. Target sang RTWPB 6 nga makapagwa sang resolution kun matapos na ang serye sang public hearings nga ginapatigayon.#
