ILOILO CITY- Nagalaum ang Regional Tripartite Wages and Productivity Board (RTWPB) nga may yara na sang issuance sa wage order sa palaabuton nga Mayo 2 may kaangtanan sa ginahingyo sang labor group nga pagpataas sang sweldo sa Western Visayas.
Sa interview sang Bombo Radyo kay Winnie Sancho,tiglawas sang RTWPB Region 6 kag nagaserbi man nga Secretary General sang General Alliance of Workers Association (GAWA), iya ginpahayag nga naaprubahan na sang Regional Wage Board ang petisyon sang Fishta Union of Employees for Reform thru Solidarity Actions – Solidarity Union in the Philippines for Empowerment and Reform (FUERSA-SUPER) para sa dugang nga P355 per day sa sweldo.
Suno kay Sancho, ginbaton sang wage board ang petition “to be sufficient in form and substance” nga nagakahulugan nga ang proseso para sa minimum wage fìxing ang makaumpisa na kaangay sang public hearings kag consultations.
Pahayag niya, ang FUERSA-SUPER ang naga- demand para sa P750 per day nga sweldo para sa mga mamumugon sa rehiyon.
Ang una nga consultation ang hiwaton sa Negros Occidental sa Abril 8 kag pagasundan sang consultations sa Abril 11 sa Iloilo, Guimaras, Capiz kag Antique; kag Abril 12 sa Aklan.
Samtang ang wage deliberation sang wage board ang hiwaton sa Mayo 22 kag 23.
Apisar nga indi pa madetermina kun i- approve ang amount, apang suno kay Sancho, isa ka welcome development nga ginhatagan sang atensyon ang petition sang labor organization.
