Ginhatagan sang importansya sang isa ka public law expert ang kahulogan sang Republic Act 9262 ukon ang Anti-Violence Against Women and their Children (VAWC).
Sa interview sang Bombo Radyo kay Atty. Kristal Suplido Adoracion, Bombo Abogado, iya ginpahayag nga ang VAWC ang gintukod sang gobyerno sang Pilipinas agud nga masabat ang nagasaka nga kaso sang violence batok sa kababainhan kag kabataan.
Suno kay Adoracion, nagalakip ang layi sang nagkalain-lain nga pag-abuso kaangay na lamang sang physical, sexual, psychological, ukon economic abuse.
Gin-athag man sini nga ang layi ang mahimo mangin pundasyon agud makahatag sang proteksyon kag remedyo para sa mga biktima sang pagpang-abuso.
Nahibaluan nga sa 2022 National Demographic and Health Survey (NDHS) nga ginpaguwa sang Philippine Statistics Authority (PSA) nagapakita nga halos 1 sa 5 ka mga kababainhan ang nakaeksperyensya sang emosyonal, pisikal, ukon sekswal nga pagpang-abuso sang ila partner.
Sang 2023, yara sa 8,055 ka mga kaso nga ginklasipikar sa idalom sang Republic Act No. 9262 ang ginreport sa Philippine National Police (PNP).
