ILOILO CITY – Indi lamang ang public officials ang mahimo nga makasuhan sang kaso nga paglapas sa Republic Act 3019 ukon Anti-Graft and Corrupt Practices Act.
Sa pagpaathag sang Bombo Abogado nga si Atty. Charl Stuyver Moleño, mahimo nga mapasakaan sang kaso nga graft ukon pagpangurakot ang isa ka public official ukon private individual nga naghimo sang krimen may kaangtanan sa graft para sa kaugalingon nga interes.
Suno kay Atty. Moleño, ang pribado nga inidibidwal kasubong sang negosyante ang mahimo makasuhan kun iya gingamit ang himata ukon kakilala nga public official agud nga makaganar gikan sa kaban sang gobyerno.
Santo sa mga probisyon sang nasambit nga layi, ang silot sa mapamatud-an nga guilty ang nakadepende sa kabug-aton sang nahimo nga sala.
Isa ka tuig tubtub 10 ka tuig nga pagkapreso, perpetual disqualification to hold public office kag mahimo nga mabawi ang unexplained wealth sang public official ukon private individual kag para naman sa mga mapamatud-an nga nagabinutig sa Statement of Assets, Liabilities and Net worth (SALN), P100-P1,000 ang multa kag isa ka tuig nga pagkapreso, depende sa desisyon sang Korte.
Ang mga akusado ang ginahatagan sang kahigayunan nga makapaathag kag may kahigayunan nga mabasura ang kaso kun wala sang nagakaigo nga ebidensya.
Bisan sin-o ang mahimo nga makapasaka sang kaso kag ang Office of the Ombudsman naman amo ang magapatigayon sang imbestigasyon.
Mahimo sa gihapon nga madutlan sang kaso ang anay public official kun natabo ang krimen sang yara pa sa pwesto ang akusado.
