𝗢𝗧𝗢𝗡 𝗜𝗟𝗢𝗜𝗟𝗢 — Ginalantaw nga dako nga bulig para sa mga drivers kag operators sang first town sang Iloilo ang bag-o nga pagsulundan nga kabug-usan nga 40% sang consolidated units ang pasudlon sa Iloilo City.
Sa interview sang Bombo Radyo kay Malvin Nad, Public Safety head sang Oton Local Government Unit (LGU), iya ginpahayag nga dako nga bagay para sa ila ang ginbalay nga agreement ni Iloilo Governor Arthur Defensor Jr. kaupod ang Iloilo City Government bangud bentaha ini para sa mga drivers kag operatos sang first town sang Iloilo.
Suno kay Nad, ila na-apresyar ang amo nga tikang bangud nahitsu ang mga grey areas sang naghingyo ang mga operators kag drivers nga himuon nga full capacity sang 40% ang pasudlon sa ila mga units.
Ginpahayag man sini nga ginalauman sang LGU sang Oton nga maaprobahan ang Local Public Transport Route Plan (LPTRP) sang probinsya sang Iloilo.
Dako naman ang pagpasalamat sang natungdan sa pagkonsiderar sa ila nangin suhestyon bangod nangin epektibo ini sa bahin sang drivers kag operators.
Nahibaluan nga una ginpanahugutan ang 25% lang sang consolidated units sang first town nga makasulod sa syudad samtang 15% ang magaserbe bilang buffer.
Apang, naghakot ini sang nanari-sari nga pakamalaut halin sa mga operators kag drivers, rason man nga ginpahanugutan ang kabug-usan nga 40% capacity sang consolidated units sang first town nga makasulod sa Iloilo City.
Nakasaad sa bag-o nga agreement nag bilog nga adlaw nga makasulod ang 40% sang consolidated units kada Sabado kag Dominggo, sa diin, 100% ini nga maka-operate base sa ila kapasidad.
Lakip man sa regulasyon ang pagdumili sa tuman ka dugay nga paghulat sa pasahero ukon “paugat” sa mga designated limited stops.
