ILOILO CITY- Naga-double time na ang Department of Education (DEPED)- Division of Iloilo nga mas mapadamo pa ang mga eskwelahan sa probinsya ang makapatigayon sang limited face-to-face clases sa pagbukas sang school year 2022-2023 sa Agusto 22.
Ini kasunod sang pagtakop na sang school year 2021-2022 kahapon, Hunyo 24.
Sa interview sang Bombo Radyo kay Dr. Ma. Luz De Los Reyes Division Superintendent sang DEPED- Iloilo, iya ginpahayag nga yara pa lang sa 60% sa mga pampubliko nga eskwelahan sa probinsya ang naaprubahan na ang application para sa limited face-to-face.
Suno kay De Los Reyes,sa bahin sang mga pribado nga mga eskwelahan, tuman ka damo pa ang wala naaprubahan ang application.
Pahayag niya, sa subong, samtang padayon ang validation, madamo sang nakit-an nga mga problema sa mga eskwelahan nga nagakadapat hatagan sang nagakaigo nga igtalupangod kaangay sang kakulang sang classrooms kag ang mga health facilities.
