HONG KONG – Wala pa sang petsa kun san-o dal-on sa Pilipinas ang abo sang Ilongga domestic helper nga nasapwan nga nagalutaw sa swimming pool kag ginbawi-an sang kabuhi sa Hong Kong.
Suno kay Bombo International Correspondent Merly Bunda, gintalana sa Oktubre 18, Dominggo, ang public viewing sa bangkay sang Ilongga nga si Adrelyn Peralta Onera, 28 anyos sang Brgy. Calicuang, Dingle, Iloilo.
Ginpahayag ni Bunda nga ang public viewing ang patigayunon 2:00 sang hapon sa morgue sang United Christian Hospital sa Kwun Tong, New Kowloon.
Santo sa impormasyon gikan sa pamilya, pagkatapos sang public viewing, iga-cremate ang bangkay ni Onera kag pagadal-on sa Pilipinas apang wala pa sang petsa ang flight.
Sang Setyembre 21, nasapwan na lang sang Laguna City lifeguard nga nagalutaw sa swimming pool si Onera nga wala sang pangalibutan.
Gilayon nga gindala sa hospital si Onera kag sang Setyembre 23, ginbawi-an sang kabuhi kun sa diin santo sa mga doktor, drowning ukon pagkalumos ang rason.
Palaligban sa gihapon bangud suno sa pamilya, swimmer si Onera kag wala man sang may nakita nga fracture ukon concussion nga palatandaan nga nadanlog ang Ilongga domestic helper.
