Natalana nga i-file subong nga adlaw ang panumbungon batok sa pulis nga ginreklamo nga nagkuha sang motorsiklo sang isa ka punong barangay sa Pototan, Iloilo.
Ang ginatudlo nga suspek amo si Police Corporal Darryl Dumaraog nga assigned sa Regional Mobile Force Battalion, samtang ang tag-reklamo naman amo si Punong Barangay Nicky Pescuela sang Lopez Jaena Ward, Pototan.
Sa interview sang Bombo Radyo kay Police Major Roy Tayona, hepe sang Pototan Municipal Police Station, iya ginpahayag nga ginbilin lang sang punong barangay ang iya motor sa plaza antes ini nag-jogging sang kaagahon.
Sang nagbalik na sa plaza, nakit-an sini ang lalaki nga nagasakay na sa iya nga motor.
Ginlagas pa ang motor apang wala na naabtan.
Suno kay Tayona, sunod nga nagpatigayon sang operasyon ang Pototan Municipal Police Station kag gin-trace paagi sa closed-circuit television camera (CCTV).
Positibo nga na-identify sang punong barangay kag sang barangay secretary ang pulis sang ginkadtuan mismo sa ila headquarters sa Barangay Jibolo, Janiuay.
Suno kay Tayona, wala na na-recover ang motor apang may ginapatigayon pa subong nga follow-up operation.
Arestado ang pulis apang nagapamalibad ini nga maghatag sang statement.
Sa inisyal nga pahayag sang hepe, may problema-pinansyal ang pulis kag madamo sang utang kag wala na sang sarang ibakal sang iya personal nga kinahanglanon.
Magluwas sa complaint nga i-file batok sa pulis bangud sa carnapping, ginapahayag nga ginahikot man subong sang mother unit sini ang administrative charges nga i-file batok sa iya.
‘WALA SANG PINILIAN’
Nagpaguwa naman sang statement ang Police Regional Office 6 nga nagapahayag nga wala sini gina-tolerar ang sala nga mahimo sang isa ka police personnel.
Kun mapamatud-an nga may sala, ipasaka suno sa Police Regional Office 6 ang nagakaigu nga kaso batok kay Police Corporal Dumaraog .
Pamatuod ini suno sa PRO 6 nga wala sang pinilian ang layi. Ginpahayag nga paandam man ini sa mga pulis nga indi gid pagpalampason sang pamunun ang anuman nga conduct, dealings, ukon involvement sang sin-o man nga pulis sa krimen ukon iligal nga aktibidad. ##
