ILOILO CITY – Naaresto sang gintingob nga puwersa sang Iloilo City Police Station 6 kag Regional Drug Enforcement unit (RDEU) si PO2 Stephen Magno sa drug buy-bust operation nga ginpatigayon sa Barangay Calaparan, Arevalo, Iloilo City.
Nabaklan si Magno sang duha ka sachet sang suspected shabu kabaylo sang P2,000 nga buy-bust money.
Sang ginrikisa, nakuha sa iya paghinakop ang 33 ka dugang nga sachets sang suspected shabu.
Ginpahayag sa Bombo Radyo Iloilo ni RDEU head Senior Inspector Kenneth Bermejo, nabudlayan sila sa pag-operate kay Magno kag nagkinahanglan pa magpatigayon sang test buy sa diin nakumpirma nila ang pagbaligya sang pulis sang iligal nga druga sa ika-duha nga test buy.
Ginpahayag ni Bermejo nga mismo si Magno ang nagdaho sa ila poseur buyer sang iligal nga droga.
Si PO2 Magno ang isa man ka lisensiyado nga Civil Engineer kag temporaryo nga na-assign sa Regional Personnel Holding and Accounting Unit (RPHAU) sa Camp Martin Delgado.
Nahibaluan nga nagapangatubang man sang kaso nga illegal posession of firearm si PO2 Magno matapos madakpan ni anay PRO-6 director C/Supt. Jose Gentiles nga naga-gamit sang paltik nga armas samtang naka-duty.