ILOILO CITY- Nag-umpisa sa isa ka police personnel ang latnanay sang COVID-19 sa police station sang San Enrique, Iloilo.
Sa interview sang Bombo Radyo kay San Enrique Mayor Trixie Fernandez, iya ginpahayag nga ang nasambit nga pulis nga pumuluyo sang iban nga banwa ang may asawa nga nagpositibo sa COVID-19.
Suno sa alkalde, matapos nagpaidalom sa swab test ang amo nga pulis, nag-duty ini sa gihapon sa police station samtang ginahulat ang resulta sang iya swab test.
Pahayag sang opisyal, sang naggwa ang resulta nga positibo sa COVID-19 ang pulis, didto na kag ginpaidalom man sa test ang 29 ka mga tawo sa police station nga ginalakipan sang 23 ka PNP personnel, isa ka detainee, 2 ka Job Order, kag 3 ka Non- Uniformed Personnel.
Sa 29 nga ginpaidalom sa test, 10 ang nagpositibo sa diin pito ang pulis, isa ka NUP kag ang duha ka Job Order.
Indi naman mapat-ud sang alkalde kon may koneksyon sa narecord nga kaso sang COVID- 19 sa police station ang pagpositibo sa COVID-19 sang duha ka empleyado sang munisipyo.
Nahibaluan nga ginlockdown ang San Enrique Municipal Police Station kag ang munisipyo bangod sa narecord nga mga kaso sang COVID-19.
